تذمر&تذمر

بيئتنا جاذبة للهم وضيقة الصدر والوساوس والانتحار والقتل والسجن وكل شي يسبب الغلقة بتسكين القاف وتثقيل اللام.

ياناس انا انسان مسالم ومالي في احد ولا احتك بالناس ولا ابي أحد يحتك فيني, ابي اروح وامشي وصدقوني ماراح اكلم احد بس مابي احد يكلمني بعد.

والله مشكلة الخز او البحلقة ( التركيز الشديد باستخدام العيون على شئ او شخص ما) مشكلة مستفحلة وليس لها حل الا بصرف طاقيات اخفاء على جميع المواطنين او الاتفاق مع احد المشعوذين لايجاد تعوذية تصيب بالعمى من يخز فيك لمدة تزيد عن عشر ثواني بغرض اللقافة.

ادخل المدونات اتصفح والله يضيق صدري هاذي ابوها مسجون وهاذا سجين سابق وهذا قفلوا عليه موقعة والثاني مسكين سطروة الهيئة والثالث طبوا عليه هو وزوجته في كوفي شوب وانواع التغليص وتخريب الجو.

ومدونة تتكلم عن الزواج وانو مالك امل اذا مافي حسابك اقل من 150 الف ومدونة ثانية تتكلم عن شيخ يقول الحريم يتكلمون بعدين يفكرون ومدونة تتذمر والثانية تتذمر وكلنا نتذمر.

تروح الخطوط تشحدذ مقعد وانت تتنتظر تقرر تكلم الاتصالات عشان تشحذ خط دي اس يلعن ابوها كلها شحاذه بشحاذه. طبعا تروح لأي دائرة حكوميه ترمي كرامتك برا وتدخل تعب تعب تعب ومن التعب تقرر تروح المستشفى وحتى ابتسامة وحدة ماتلقى انواع التصريف وسوء المعاملة وكل الناس مدراء موظف الاستقبال مدير والممرضة مديرة وكل الي ينتظرون في غرفة الانتظار مدراء وعيب يكلمون بعض بس يخزون ويبحلقون وتطلع من المستشفى تعبان نفسيا وتقرر تزور طبيب نفسي الي يقولك مالك الاتشم هواء.

تقرر تطلع من البيت تشم هواء ما تلاقي الا زحمة وحر وقيادة ممتعة ومافيها اي تجاوزات ولازم توقف في خط سريع عند نقطة تفتيش وعند الاشارات الناس تتلفت كأن ولدهم ولا ابوهم ضايع وبيلاقونه بسيارات الناس . السوال المهم وين اروح كوفي شوبز ولاقهاوي مممممم خيار صعب.

مافيه اي احترافية بالتعامل ومفهوم الزبون لا يعني اي شئ هنا مثلا تدخل تبغى تشتري سجادة لغرفتك الجديدة (مو أنا) بالموت يعطونك وجه ياناس انا ادفع فلوس مفروض تتنافسو عشان تكسبوني كزبون والله حااالة بالنهاية اشتري من الطف بائع وليس من صاحب افضل سجادة. اكلم شركة الاتصالات الموقرة وبسبب مشكلة فنية يعطيني رقم هاتف اخر اتصل به لاجل انهائي معاملتي ولما قلت له عفوا بس ما اتوقع انها وظيفتي اني اتصل عليهم وأخبرته بأن عليه الاتصال بهم بنفسه لأنني كزبون لي الحق بالحصول على المنتج النهائي (دي اس ال) بدون الدخول في معمعة البروقراطية حقتهم ورد على الموظف بهذا الرد وقبل ذكر الرد  ابغى احلف عشان تصدقوني ورب السموات السبع ورافعهم انه قال لي”" انا مش فاضي”".

شعب ملقوف ويتدخل بخصوصيات بعض وكل واحد يبغي يتولى الوصاية على الاخر. ياناس ياعالم عيشوا وخلوا الناس يعيشون. انا مابغى بنات الناس يكشفون بس اذا كشفت زوجتي لاحد يكلمني انا ما احب طاش ما طاش بس الي يحبونه بالعافية عليكم تابعوه بالعربي وعلى قولة الدكتور المصري صاحبي لا نغلس على بعض. ياناس ياعالم بطلوا الاكثار من  جملة انما منع لسد الذرائع لانه من كل حبة نقدر نسوي قبة.

كتب التذمر أعلاه بلحظات اكتئاااب

التهمة:شعره طويل

بما اني من شباب الرياااااض الحين سمعت في أحد السوالف قبل شهر رمضان من احد الزملاء  ان الشرطة في شارع التحلية تقبض (حلوة تقبض) على اصحاب الشعور الطويلة وتجرجرهم ع القسم لأجل التحسين (كلمة يستخدمها أبوي واصفا بها عملية الحلاقة) طبعا انا لم القي لحديثه بالاً  وقلت شكل الشاب يحب يبالغ قليلا وبالعربي ينصب.

عدم تصديقي له لأن الشرطة عندنا مو فاضية تلاحق الشباب الصغار أصحاب الكدش او الافرو (كلمة تستخدم لوصف الشعر المنفوش الطويل) وتترك اعمالها بمكافحة الجريمة والارهاب ولأن عناصر الشرطة لم يتلقوا اي تدريب  لكشف أصحاب الشعور المكدشة أثناء دراستهم بالكلية و ايظا لأنهم لم يتلقوا اي تدريب خاص بحمل مكائن الحلاقة او استخدمها.

السالفة هنا. وهي ان اخوي فيصل شاب عمره 19 سنة  اعجب بهذه القصة لاسباب غير واضحة بالنسبة لي او قد تكون بسبب أزمة هوية يمر بها كغيره من المراهقين واصبح شعره طويل ومنفوش ومعكرش ولم يزعجني ذلك او احد من أهلي  لانه هو الذي يحمل هذه الكمية العالية من الشعر على رأسة.

أمس على امتداد العليا العام كان هناك نقطة تفتيش اوقفت فيصل وسحبت منه الرخصه ووقال له العسكري”"لبق على جنب”".

وكأي مواطن صالح “”لبق”" فيصل على جنب وجاء يستفسر عن سبب ايقافة. فقال له العسكري ليش شعرك طويل طبعا الجواب المنطقي هو لاني لم اقم بقصة منذ زمن طويل واذا كان العسكري متنح ممكن تبدأ معاه وتقول له ان الشعر ينمو بمعدل كذا وكذا يوميا  وتشرح له فسيولوجيه نمو الشعر وتخبره بان الشعر يطول اذا لم تقم بقصه.  لكن سوال العسكري كان ليش شعرك طويل=شعرك الطويل مو عاجبني

طبعا لا اجابة في العالم تستطيع تقنع هذا الشخص انها حرية شخصية ولا اعلم كيف ان شعري الطويل ممكن ان يؤذيك بأي طريقة فهو لم يقفز على بيت ناس ويسرقهم  وايظا شعري المسكين لم يخالف القانون ويتعدى السرعة المسموح بها ولم يقم بأي عمليه مشبوهه فلماذا تتسلطون على شعري. لا اعلم كيف ان كمية  من الشعر الملفلف ممكن ان تؤذي عينيك ايها العسكري.

طبعا في حديثي مع احد الشباب اليوم الي قال لي ان هذا الشي تمام ورهيب لان المكدشين يقلدون الغرب وهذا مو من ديننا ولاطبائعنا. اوجعني راسي من كلامه لانو ممكن تصير الجينزات والتيشرتات ممنوعة والاغاني الغربية المنحلة ما تدخل البلد والديكورات الايطالية والفرنسية تمنع من دخول البيوت لانها مجرد شكل وهذا الشكل يجعل بيوتنا تشبه بيوت الغرب المنحل. وايظا لما تدخل الحلاق تختار فقط من بين خمس قصات اختارتها الدولة لنا لانها تتماشي مع عادتنا وتقاليدنا.

كثير ممن شابت شعورهم  ومن تساقط الشعر من رؤسهم بسبب الزمن يصفقون فرحين بأصدار هذا القرار لان الشعر الطويل من التشبة بالغرب وهولاء الرجال ساقطي الاسنان يلبسون ثياب وشمغ مصنوعة بالاحساء والقصيم  ولايحملون قلم من ماركة فرنسية ولايلبسون كبكات من ماركتهم الاوروبية المفضلة اوجزمة إيطالية لانها مريحة وطبعا المحفظة ليست من ماركة معروفة  بس يجوز لهم ذلك لانهم لابسين ثياب وشمغ.

انا اعتقد انه اي  شخص يستطيع تقبل او عدم تقبل هذا الشكل او اي شكل او فعل مما يصنف تحت قائمة الحريات الشخصية لكن ان نرميها بالخطأ او الصواب هنا يجب ان نفكر قليلا قبل ان نتكلم.

فقط في السعودية

فيه مولات للعوائل

وفيه حدائق ومنتزهات للعوائل

وفيه مطاعم وكوفي شوبات للعوائل

*

*

*

*

لكن بالنسبة لي هاذي جديدة

ابد مش

discrimination

واخيرا ظهر الاسلام

يا الهي اشعر بسعادة عظيمة وعيوني تتلألأ نورا وفرحا وانا ارى انتفاضة شعبنا الطاهر على الشاب مازن عبدالجواد. نعم نحن مسلمين ولا نرضى بمجاهر بيننا كيف نرضى نعم كيف نرضى اذا كان فاسد فعليه ذنبة ولكن ان يجاهر لا والف لا.

عندما قامت قناة الLBC  التي لم تجعل لها هدفا الا اظهار سلبيات مجتمعنا وهدم اساسته بعرض هذا الفيديو المقزز لم اتمالك نفسي كغيري من أبناء هذا الوطن بأن ارفع صوتي بمعاقبة هذا الشاب المجاهر ليس لانه سعودي لا بل لانه مسلم نحن نطالب بحكم شرعي ضدة وعشرين الف خط تحت حكم شرعي.

صحيح المسلمين في القنوات الفضائية يجاهرون بالمعصية حينما يحيون الحفلات الغنائية وايظاََ يجاهرون حينما يختلطون رجالا ونساء بالمسلسلات السعودية ولكن ان نخرج عن المألوف بمجاهرتنا هذا هو البلاء.

نعم نحن نعلم ان المواعدة بين الشباب والفتيات من أبناء هذا الوطن الطاهر موجودة ولا اعلم نسبة الممارسين لهذه الخطيئة. الكثير من ابناء العشرين للثلاثين سنة لدية صاحب او قريب اومعرفة بشخص ما يقوم بذلك. قد تختلف ردود افعالنا وعلاقتنا بالممارسين لهذا الذنب ولكن بالنهاية الكثير يتبع المقولة المأثورة ذنبة على جنبه وبالعربي وش دخلني.

اعتقد ان سبب الغضب ليس اسلامي بحت لكن كون هذا الشاب اللطيف سعودي قد اثار الحمية الاسلامية في قلوبنا فجأة ولن يهدئ هذا الغضب العارم الا انغام موسيقية بصوت شاب مسلم تباع أشرطته في جميع محلات التسجيلات  السعودية او رقص فتاة مسلمة على احد قنواتنا الفضائية التابعة لدولة إسلامية.

غنم xغنمxغنم

قدر الله علي وبقى كم اسبوع وتنتهي صلاحية بطاقة أحوالي ولخوفي الشديد انهم يقفلون حساباتي البنكية وماعاد اقدر اضارب في البورصات العالمية واخسر جزء من اموالي وقد اتسبب بانهيارات مالها داعي في وقت الاقتصاد العالمي في امس الحاجة الى ناس مثلي وشرواي قررت اني اعجل بتجديدها.

لبست ثوبي وشماغي وشخصت وطلع شكلي كاني احد ابناء الجاليات العربية لما يلبس شماغ بس ماعلينا الرجاجيل مخابر مش مناظر على قولتهم الزبدة اخذت ملف علاقي اخضر حطيت فيه اوراقي وصوري الشخصية وانطلقت باتجاه احوال الدمام.

الجو ساخن ومشمس لابعد درجة مافيه اي لوحات ارشادية فدخلت من بوابة ولقيتها مقفلة وكان معاي شخص يبدو من ملامحة انه من الاعراب وبدال ضرب المشوار الى البوابة الاخرى قرر استخدام جينات القرد لدية والقفز من على السور وكملت مشواري باتجاه البوابة الاخرى وكغنمة تتبع القطيع اشوف وين الزحمة واروح لانو مافيه اي لوحة فقط لوحة على باب مكتوب رئيس قبائل الربع الخالي او شي مثل كذا لقيت عسكري وسلمت مارد وسلمت مارد احترمت نفسي وماعاد سملت مديت الملف الاخضر لانه الشي الوحيد بالوان هناك وطبعا اخواني السعوديين انواع السقطات علي (يعني يتجاوزني كاني جدار) ومديت ملفي لسعادة فضيلة اللواء الركن الشيخ العسكري وبعد كم دقيقة اخذه وتصفحة بسرعة وعطاني رقم رقمي كان 490 والرقم ع الشاشة 133 ومكتوب ع الورقة الوقت المتوقع للانتظار ستة ساعات واربعة واربعون دقيقة مع انو بتكون الاحوال مقفلة بعد ستة ساعات.

بدأت رحلة الانتظار وبطريقة ما جاء دوري رحت لشباك 3 سلمت ومارد وطبعا فيه اثنين قبلي قاعد يخلص اوراقهم يعني مادري ليش ناداني الشيخ اخذ ملفي وشخبط تحت قال روح شباك 6 رحت ولا سلمت اخذ ملفي وشخبط هو الاخر وقال خلاص روح للصادر والوارد عشان يجيبون ملفك من مصدر البطاقة قلت ايش؟؟ قال عشان يجيبون ملفك من مصدر البطاقة قلت يعني مافيه بطاقة لي اليوم قال لا. امنت بالله ورحت للصادر والوارد بعد سوال كم مراجع عن محل هذا المكتب لقيت واحد لوتبوني احلف انهم غاصبينه يشتغل او انه يشتغلل ببلاش قال لي هات الملف وراجعنا بعد 3 اسابيع قلت انا مش فاضي بعد 3 اسابيع (يعنني) قال روح لمدير الاحوال. شخصت ورحت لسعادة المدير وحكيت له السالفة قال لو انت متزوج كان طلعتها لك الحين قلت خلاص زوجني بس اخلص قال حلك الوحيد انك  تكلم واحد في مكتب الاحوال الي طلعت بطاقتك منها عشان يرسل ملفك خلال اسبوع. والله لو يرسلونها على ددسن يدفونه اربعة رجال كان جات قبل اسبوع.

نسيت الموضوع وجلست اربعة شهور تعرفون لازم وقت اجدد فيه نفسيتي رحت الاحوال الاسبوع الي راح وعلى مكتب الصارد والوارد تعرفون صرت ادل قلت عطني ملفي قال ملفك جاء لكن الارقام خلصت تعال بكرة قلت ياخي انا انتظرت وصفيت واحترمت نفسي قبل فترة عاد خلصوني وكأني اكلم جدار. رحت لصديقي  مدير الاحوال قلت له السالفة قال روح كلم العسكري يمكن يعطيك رقم رحت لسعادة العسكري والله حسيت اني ناموسة تحاول تلفت انتباهه وهو معطيني خامس قلت ياخي ابغى رقم انا مواطن جاكم في دوامكم الرسمي ولا قبل لايتنهي باربع ساعات يبي يخلص امورة طبعا بدون اي نفس قال مافيه ارقام تعال بكرة قلت ياعزيزي انا مستأذن من الدوام وماقدر بكرة بس رش فليت و زلبني الشيخ.

رجعت للمدير قلت له رفض العسكري واذا بتخدمني باكون شاكر واذا لا تراكم بطيتو كبدي. تكرم علي واخذني قبل كل الناس وعطى ملفي لواحد عند شباك 4 شخبط وقال روح صور. اخيرا اخيرا لالالا مش قادر اصدق اكيد راح ابتسم في الصورة من الفرحة رحت مكتب التصوير وعطيته الفايل طبعا هذا الكلام عشرة وربع قال تعال بعد الصلاة جيت بعد الصلاة وصورت بعد انتظار ساعة وربع وبعدين قالوا تعال بكرة خذ البطاقة.

الزبدة مفروض كل عشرة سنين تعطينا الدوالة اجازة رسمية لتجديد بطائقنا 3 ايام تجديد و7 ايام لتجديد النفسية وايظا انصح بوضع طبيب نفسي عند باب الدخول لتجهيزي للصدمة واخر عند باب الخروج (هو نفس باب الدخول) لتقييم حالتي ومحاولة اصلاح مايمكن اصلاحة.

انصح اخواني المراجعين كم نصيحة الاولى لنحترم بعض ونحترم الطوابير والثانية ارموا كرامتكم عند الباب لانك هناك راح تعامل كغنمة مالم تكن لديك بعض المعارف عندها ستتطور الى ادمي في احد البلدان المتطورة.

واخيرا لاتنسوا الدعاء التالي:اللهم إني أعوذ بك من الهم والحزن والعجز والكسل والبخل والجبن وضلع الدين وقهر الرجال.

تكفون يامنتخب لاعاد تفوزون

الحين اشتغل مع دكتور يحمل احزن صوت بالدنيا, قسم بالله لو يتكلم شوي ودمعتي تنزل (صاير حساس) مثلا لما اقولة وشفية المريض هذا يسكت شوي بعدين يناظرني نظرة عميقة ويقول والله ياعبدالله مش عارف ابدى من فين لكن البيبي ده انولد وكان طبيعي وبعدها بيومين… ويكمل السالفة انا قاعد اتسمع لنغمة صوته ومادري ايش قاعد يقول الزبدة مو هنا الزبدة انه يحمل اكبر كف يد شفته بحياتي يعني من جد شي مهول وبنرجع ليد الدكتور الكريمة نهاية السالفة وكيف نستفيد منها.

وبما اني من عشاق الاخضر امس ماشفت المبارة وكنت اذاكر ومن حين لحين اسمع صرخات جيراني دلالة على ملحجتهم ( كلمة تستخدم لوصف شخص بانة متخلف ولا يقدر الاخرين ولا اقصد بها منطقة لحج) المهم نرجع لسالفتنا دلالة على ملحجتهم اولا او هجمة خطيرة او هدف الزبدة قررت اني اطلع للشباب بعد المبارة وياليتني ماطلعت لانها زادت عدد النغصات في قلبي على ابناء وطني.

طبعا في البداية عدد السيارت الي تمشي فوق 160 كان عالي جدا وطبعا لازم الفلشرات شغالة(الانوار الصفراء الخلفية للسيارة) وشخصيا ماعندي مشكلة تبي تسرع اسرع انت الي بتنشل او تموت لكن انك تعرض حياة شباب مثلي وشرواي للخطر هنا انا ازعل وزعلي شين يعني اوكية انت خالفت بانك مسرع ليش تخربها وتزيد عدد مخالفاتك بالتجاوز الغبي من اليمين واستخدام الانوار العالية. طبعا هنا صرت امشي بالجهة اليمني من الخط السريع خوفا وجزعا على سيارتي او ماتبقى منها والاهم من ذلك حياتي.

الى يومنا هذا لم استطع ولم استطع ولم استطع فهم سياكولوجية الفرحة والشعور بالانتماء لفريق يعني يوجد فرق شاسع بين اني استمتع بمشاهدة المبارة لان الفريق يلعب بشكل جيد لكن اني ارقص او حزن لخسارتة ماقدرت خل نركز مع بعض شوي ونحلل كرة القدم عبارة عن ايش. الي يسوونه اسمة لعب في محل اسمة ملعب والاشخاص يطلق عليهم لاعبين وانا من صغير اقرن اللعب بالاستمتاع.

الي ضايقني اكثر شي كان فيه مجموعة اطفال بين سن ال17 الى 23 (انا 24سنة) مقفلين الشوارع وقاعدين يرقصون يعني انا وش دخل اهلي تخرب ام ليلتي عشان تفرح انت. اوكية انا مش فاهم ليش تفرح بس ماعندي مشكلة اذا بتفرح لكن لا تجعل فرحتك مصدر تعاستي. وبعدين الغريب ان عدد الراقصين كان عالي جدا يعني لم اكن اعرف ان شبابنا يمتلكون هذا التوافق العظيم بين الاصوات وحركة الجسم.

كنت الى قريب اؤمن باهمية التعليم وانه فوق الالزام او التخويف عند تطبيق القرارات ولا زلت لكن اذا كنا نريد حل سريع سنحتاج الى الف يد بحجم يد الدكتور فوق عشان نستخدمها لاعطاء الكفوف لهولاء. ممكن تفكيري همجي لكن الي خلاني اقول كذا هو كيف اني لما اروح الرياض واشوف الناس ملتزمة بسرعة 120 اقول ماشالله باين ناس متعلمة لكن الي حاصل انهم خايفين من المخالفات وصحيح الطريقة الي استخدمتها الشرطة لتطبيق نظام 120 لا اوافق عليهم لكنها حلت المشكلة ولو بشكل مؤقت وبعدها اوافق ابدؤا التعليم. فيه ناس تقول لكن هذه الطريق التخويفية ستجعل الناس يعودون لعادتهم القديمة عند اختفاء الشرطة او مطبق النظام وانها تحمل الشرطة تكاليف عظيمة لزيادة عدد افرادها وعدد السيارات وكميرات المراقبة بس انا اقول ان الشرطة مطلعبن خير من وراها بعد.

وللحديث بقية

شهر زمان

في زمن اغبر طلب معلم مادة التعبير من فيصل اخوي في سنتة الاولى في المدرسة الابتدائية كتابة موضوع عن المدرسة فقام فيصل ابو الخيال الواسع بكتابة التالي: احب المدرسة و احب الطاولة واحب السبورة واحب المساحة واحب الكرسي واحب المقلمة والقلم واحب الدفتر…. وكل ماوقعت عيناه عليك في تلك الساعة حتى ملأ صفحة دفتر كاملة.

في لحظات هنائي ومن حين لاخر كنت امدح المنطقة الشرقية ومدى حبي لها لكن خلال داومي لشهر كامل شارف على نهايتة هنا في الرياض اكتشفت اني اعشق المنطقة الشرقية ولو طلب مني اي مدرس مادة تعبير كتابة موضوع لملئت له دفتر من احب واحب واحب عن الخبر والدمام واهلهما.

طبعا كنت اتوقع اني راح اواجه مشكلة مع المرضى في الرياض من ناحية تكبر وصعوبة في التعامل لكن اقسم بالله انهم غلبانين طبعا لا انسى اني في مستشفى يتبع لوزارة الصحة حيث ان كثير من المرضى يا من الطبقة تحت المتوسطة ممن لايمكلون فلوس للمستشفيات الخاصة او من الطبقة المتوسطة التي تبحث عن كفائات ودكاترة جيدين وايظا كثير من المرضى المنومين محولين من مستشفيات خارج الرياض.

من الاشياء المؤلمة

لما رجعت من كينيا قبل سنتين قلت ليوسف اخوي ان الناس داقهم الفقر الشديد الشديد (حايس ابوهم ) الى حد انهم اصبحوا لطفاء ولا فيهم حيل واقسم بالله العظيم لي سبع شهور من صرت طبيب امتياز(لسه بيبي) والفترة الاولى منها كانت في الشرقية وما شفت هذا الشي الا هنا في الرياض يعني ناس جدا جد غلبانين يعني لو قلت له لف يمين لف ولو قلت له لف يسار لف وفيه ناس تجينا من بعد الف كيلو بس عشان تراجع في عيادة يعني والله حاجة مؤلمة طبعا الي يفضخ القلب (كلمة تستخدم هنا وتعني يقطع القلب من القهر)انك تجي الف كيلو او حتى ثلاثمئة كيلو لعيادة استشاري في احد التخصصات الدقيقة وتلقى واحد ثاني جالس على كرسية وتقول له وين سعادة الدكتور فلان يقول لك والله في اجازة والحل اننا نعطيك موعد ثاني لما يجي الشيخ.

من الاشياء الجيدة

المستشفى هنا من جد فيه احترافية في التعامل بين الموظفين يعني رجل الامن يقوم بشغله كامل ولا له دخل باحد والممرضة ما تتدخل بشغل الطبيب والعكس وطبيب التخدير ما يتفلسف على الجراح والعكس يعني كل واحد عارف شغلة ولا له دخل بالثاني بس من جد خلية نحل.

ومن الاشياء الجيدة لما تكون مناوب توفر لك المستشفى ثلاث وجبات صحيح اكل ابو طقة لكن اكل.

ايظا فيه باصات رايحة جاية من المواقف لمبنى المستشفى.

المحاضرات والكورسات متوفرة بكثرة في المستشفى وصراحة شغل نظيف.

واخر شي كطبيب امتياز ستتاح لك الفرصة للعمل مع استشاريين بكثرة عكس مستشفانا الي كنا نشتغل مع الاطباء المقيمين

من الاشياء الغريبة

طبعا منذ نعومة شاربي  وانا اواجه مشكلة في التحدث مع الجنس الاخر يعني لما ابدي سالفة ونادر ما اكون انا البادئ تنتهي بسرعة رهيبة ومخيفة. هنا واجهت عدد لابأس به من الفيميل ستاف و مع استغرابي الشديد يحبون يدقون حنك (يسولفون) سوالف عامة ويخشون بعين الواحد طبعا صراحة توقعت ان البنات هنا راح يكون اكثر تحفظا من الشرقية لكن كذب توقعي.

الخلاصة

يبقى المستشفى التعليمي ببلاطة الازرق القديم بيتي  وله معزة خاصة بقلبي.

فجعتوني والله فجعتوني

اليوم قبل شوي صار لي موقف من المواقف الي من جد يطلق عليها مواقف بص حضرتك (يعني مدري وش تبي). بما اني عزابي و الكثير من العزابية يستخدمون اكياس الملابس الجاية من المغسلة بعد ربطها من الاسفل لحمل ملبسهم المتسخة مرة اخرى الى المغسلة.

بعد تجمع الكثير من الملابس الغير نظيفة سويت التكنيك الي فوق ومليت الكيس فخفت ينقطع وجبت كيس زبالة اسود وحطيت كيس الملابس فيه (ادري ام الخنبقة والخنبقة هي التلفيق) يعني صارت ملابسي في كييس لونه بيج والكيس البيج حطيته في كيس زبالة اسود.

وفجأة وبلا اي مقدمات قررت اني احط الكيس في السيارة من الحين (الساعة 3 الفجر) عشان الصباح راح اكون شايل معاي اغراض ولسبب اخر وهو ان سيارتي موقفها في الشارع المقابل يعني لازم اقطع الشارع العام ومالها داعي على زحمة الصبح شايل كيس ثقيل وقاطع الشارع.

فنزلت من الشقة شايل كيس اسود منتفخ وقطعت الشارع وفتحت شنطة السيارة وحطيت الكيس الا وفجأة وبلا مقدمات مرة أخرى وقفت جنبي سيارة صغيرة وفيها اثنين شباب اشكالهم شبهه واحد منهم لاف شال ولابس ايس كاب بعني اثنين فاضين يتمشون الفجر. سويت اني ماشفتهم ومشيت لكن على مين. نزل السواق من السيارة وقال لو سمحت وايظا يعنني ماسمعت وبالعربي صرت اصم وابكم. والي مايعرفني انا شاب مسكين صغير شكله ابد ما يخوف

واصر السواق: لو سمحت

انأ  : امرني ياخوي

هو: تعال ابيك

طبعا انا توقعت شيئين يا انه بيشحذ مني فلوس او بيسطرني وبياخذ مني فلوس طبعا زلبته ومشيت الا فجأة قرب مني ورفع قميصة( لابروح بالكم بعيد) طبعا يوم رفع قميصة دخل يدة وسحب مسدس بعدين يوم شافني وقفت رجعه لجرابة (حامل المسدس) بس استمر ماسكة بيدة اليمين في وضع الاستعداد. هنا انا من جد ضعت في ظلمات الخوف و قلت وش ذا الي يستهبل على الفجرية.

هو: وش الكيس الي معاك؟

انا: بدأت استعيد رباطة جئشي وقلت بس مين معاي؟

هو: المباحث الجنائية بدون نفس وكمل كلامة وقال وش الكيس الي حطيته بالسيارة؟

انا: ملابسي!

هو: افتح الشنطة وايظا بدون نفس

وبكل ادب فتحت الشنطة لانو مش انا الشخص الي معاه المسدس

وقال: افتح الكيس

وفتحته وخليته يشوف بعدين قال سيارتك وضعها سئ (ماغسلتها منذ شهرين بس وش دخل اهله) وكمل عطني اثباتك قلت اثباتي بالشقة وبعدين استخدمت الكلمة السحرية الي اكتشفتها من شهرين وهي (انا طبيب بالمستشفى التعليمي بالخبر) تفضل معاي فوق واعطيك اثباتاتي.

ناظرني من فوق لتحت بعدين قال روح الله يستر عليك.

يعني معليش بس من جد معليش فجعتني الله يفجعك هذا اسلوب بالله !!!!!!

انقذوا غزة

كخروف من خرفان العالم وكوني خروف صريح و اعترف اني لن استطيع تغيير ما يحصل في غزة وصراحة ما قاعد اتابع الاخبار لكن اليوم بالغلط في دانكن دوناتس وقعت عيني على عدد القتلي والجرحى بالتلفزيون وبسرعة لففت رأسي وطلبت حبتين دوناتس وكوفي وطلعت للشباب.

فمن انا نعم من أنا حتى اغير ما يحصل هناك. اذا تخيلنا ان الكون مكون من مجرات وكواكب ومن جميع هذه الكواكب اخترنا الكرة الارضية ولففناها حتى نصل لخريطة المملكة العربية السعودية ومن خريطة المملكة اخترنا المنطقة الشرقية ومنها الى الدمام وبحثنا في الدمام عن عمارتي ثم شقتي في الدور الثالث ومن بين حوسة الملابس وكركبة الشقة ستجدوني انا عبدالله طبيب الامتياز الذي لم يقرأ جريدة ولم يفتح تلفزيون في الشهر الاخير ولم يناقش موضوع غزة مع احد حتى يومنا هذا.

اذا كان هذا الشي دلالة على تخاذل المسلمين فأنا ابو المتخاذلين وقائدهم. لا اعتقد حاليا (استخدم كلمة حاليا لغروري) اني استطيع تغيير ما يحصل هناك ولو صرخت بأعلى صوتي او تسلفت بندقية وذهبت الى هناك.

أرى ان من حولي يعيشون في نصبة كبيرة نعم ننصب على بعض ونمشي النصبة لبعض وندعي اننا نهتم بما يحصل هناك فلا اعتقد ان متابعة ما يحصل من بيوتنا الدافئة وبيالات (جمع بيالة وتعني فنجال) الزنجبيل في ايادينا ستحل المشكلة لا اعتقد ان مناقشات شيابنا (عكس الشباب) موضوع فلسطين في كل مجلس واقتراح الحلول سيحل هذه المعضلة ولا اعتقد ان قصيدة تصلني على ايميلي عنوانها غزة ستحرر فلسطين او نشيد ديني سيحررها ولا اعتقد ان عندما يقوم كاتب واحد او الف كاتب بجرائدنا المحلية بأدانة ما يحصل سيحل المشكلة لان اسرائيل راح تقول اووووف لقد قاموا بأدانة ما نعمله خاصة الكاتب الفلاني في جريدة الوطن السعودية فخلاص لازم نوقف قبل لا يدينا شخص اخر.

اكره لما ادخل الماسنجر والاقي واحد كاتب في ال personal message انقذوا غزة يعني بلاش نصب على بعض ولا لما اروح الشباب والقاهم حاطين على اخبار غزة وقاعد يلعبون بلوت يعني من جد ابو الاهتمام باحوال اخواننا في فلسطين.

شخصيا لا اهتم بما يحصل هناك ولم اتبرع بريال لاخواني اهل غزة لانو اذا جا يوم ومسكني واحد طويل وعريض وقاعد يسطر فيني ويلقمني من الكفوف واللكمات الشديدة ومر رجل ووضع عشرة ريالات على الرصيف وقال لي اذا خلصت متسطر روح المستشفى عالج بالعشرة هاذي و ايظا خذ عشرين اشتر لنفسك حاجة تاكلها صراحة راح اكرهه اكثر من المستبد الي قاعد يسطرني.

ما قاعد اقول اتركوا حياتكم الناعمة المرفهه الجميلة وروحوا قاتلوا في غزة ولا اقول تجاهلوا ما يحصل لكن لاتلعبوا على انفسكم يعني لنكن صادقين مع انفسنا. اعرف ان عواطف الكثيرين حقيقة لكني ربما لا يعرفون كيف يوجهون هذه العاطفة واذا كان تبرعك بعشرة ريالات سيريح ضميرك ويجعلك تشعر انك قمت بشي جيد ووقفت مع اخوانك فلا تتردد بالتبرع.

والسلام خير ختام

الطلاق مرتان

السلام عليكم

هذا ثاني مره اترك البلوق فترة طويلة وانشالله بتكون الاخيرة. لان الطلاق مرتان واذا رجعني وورد برس المره هاذي المره القادمة ما اتوقع.

السبب الرئيسي لهجري البلوق اني عادة اكتب لما اكون متضايق من شي لكن ولله الحمد كانت الشهرين الاخيرين جيدة بوجود طبعا بعض اللحضات التذمرية وان لم توجد بحثت شخصيتي النكدية عنها.

على كل حال عودتي يوم العيد لاتعني ضيقتي من العيد لكن قلت ايش وقت اكثر بركة من هذا للعودة.

فكل عام انا وانتم وكل مسلم وغير مسلم بالف خير وصحة وعافية وسلام. والله يسهل اليوم هذا على الخرفان اما بذبح سهل سريع او بيوم ممتع