ميكي ماوس يعاني من اكتئاب شديد

عاد ميكي ماوس صاحب الشخصية المرحة والصوت الناعم في الايام الاخيرة للساحة الاعلامية لكن ليس كما يتمنى كل فأر حيث ان الشيخ المنجد دعى الى قتل الفأران بشكل عام ومنهم ميكي ماوس الذي افادت اخر الانباء انه يعاني من اكتئاب شديد ولم يخرج من بيته الصغير طوال الاسبوع الماضي وانه يفكر بالانتحار طبعا المضحك في الامر هو تعليقات قنوات التلفزيون العالمية على كلام المنجد.

وهنا مقطع كلام الشيخ

والي ابد مو داري شالسالفة هنا مقال جيد من عرب بزنيس بقلم وائل مهدي.

————

تحديث في 4-10-2008

الشيخ المنجد يرد:

يوميات

قررت اني اجرب(مجرد تجربة) واكتب يومياتي الي هي احداث اكثر من ان تكون خواطر او عواطف فهاذي يومياتي للخمسة ايام الي راحو.

يوم الاحد نهاية يوم 14 سبتمبر

صحتني امي على اذان المغرب نزلت تحت وافطرت مع العائلة فيصل اخوي في جدة طبعا الشعور جدا رهيب مو رهيب لان اخوي بجدة ولكن رهيب انك تلقى فطور جاهز وبعد صلاة العشاء طلعت للنادي رجعت البيت ركبت سيارتي ولحقت العائلة لبيت عمي الي ماكنت ابد متحمس اني اروح له لاشتهارة بكونه العم الكاش (مو فلوس ولكن اسلوب) يعني يخش بعينك وابد مو فريندلي (ودود) طبعا رحت عشان خاطر ابوي ولا عمي مو داري اني في الرياض تعشينا وبعد العشاء دخلت في المجلس ودخل عمي وراي وجابو الشاهي الا ابوي توه طالع من المقلط وقال لعمي يالله انا استئذن طبعا هنا تلقيت لطمة نفسية شديدة على خدي الايسر لتوهيق ابوي ولاضطراري للجلوس لوحدي مع عمي صبيت لنا شاهي والسكوت الغير مريح كان المسيطر على الجو واول ما خلص الفنجال بدقائق قلت يالله انا استئذن ورد علي رد لطيف وغريب قال بدري شفتو كيف كلمة عادية مثل هاذي تعتبر لطافة الزبدة قلت من عمرك. اخر الليل كلمني صاحب قديم كنت مواعدة من امس فاضطريت اطلع معاه وكان مزعج بشكل غريب حيث انه يملك وجهة نظر لكل شي في الكون وما امزح لما اقول كل شي يعني لو قلت له وش رايك في الاحتباس الحراري وتأثيره على حشائش السافانا ماراح يتردد ابد قبل لايبدئ خطبته العصماء ويمكن يعطيني لستة باسامي المسؤلين عن هذه الظاهرة.

يوم الاثنين 15 سيبتمبر

اليوم عرفت اني ملخبط ولازم ليل الثلاثاء (غدا) اكون بالدمام وكنت على بالي راح اجلس يوم زيادة بالرياض لكن لعلها خيرة. اليوم فتحت عيوني الساعة اربعة طلعت وسولفت مع امي شوي بعدين قرأت الجرايد مع ابوي (ما نقرأ الجريدة سوا ولكن في نفس الغرفة) وبعد الفطور رجعت انام صحيت عشرة وطلعت للنادي  والي عرفت منه ان بعض شباب الرياض فيهم نوع من الجلافة وبكلمة أخرى وقاحة يعني ما ادري اذا انا كنت لابس طاقية الاخفاء ولا مكتوب على جبهتي (لاتأخذ هذا الشخص بشكل جدي) لانو اكثر من جهاز وانا اتدرب عليه يجون ثلاث شباب ومره شابين مع بعض ويخشون علي ويبدأون يتدربون ولا متحمسين ويصارخون لبعض( يالله يا بطل ما بقى شي ) بعدين رجعت البيت و كلمت أحمد زوج اختي لاننا كنا متواعدين وطلعنا سوا وتعشينا بمطعم مكسيكي وصراحة استمتعت بالطلعة وفاجأني بسوال غريب لما قلت له اننا لازم نناوب بالمستشفى ونجلس فيها اربعة وعشرين ساعة قال طيب ما فيه غرف عوائل للدكاترة المتزوجين قلت له لا لانها بس اربع وعشرين ساعة .

يوم الثلاثاء 16 سيبتمبر

مشيت من الرياض الساعة ثمانية مساء باتجاه محطتي  التالية الخبر بعد سفرة عامره بالحلويات شاركتها مع العائلة وصلت تقريبا الساعة 12وكنت لابس السكرب سوت (لبس المستشفى) من البيت في الرياض فرحت المستشفى على طول لان دوامي راح يبدأ الساعة 2 تسكعت قليلا مع حسن بعدها تعشينا او تسحرنا حاليا اكتب من غرفة الطورائ مع اقل بروفشانال نيرس ممكن الواحد يشتغل معها عادي اكلمها وتزلبني من جد فاهية والحين هي ام الازعاج على التلفيون فيه مشكلة دم ما وصل لمريضة تو دخلناها. الان الساعة 6 صباحا ماشفت الا ثلاث حالات دقيقة (مو حالات دقيقة ولكن اعطوني دقيقة من وقتكم) ايها القراء النيرس دخلتني في مشكلة الدم… ايوه رجعت وانحلت مشكلة الدم. يارب يستمر الوضع بالهدوء هذا اذا لم يوجد اي كلام بعد النقطة التالية فالوضع استمر على وضع الهادئ.  يبدو انه لم يستمر دخلت مريضتين   ودقيت على الدكتور مرتين بيجر وعلى الغرفة وبالاخير رد وقالي الاولى صرفها ببنادول والثانية ارسلها لغرفة الولادة فوق وحاليا اكتب على سريري بنص عين. سلام.

يوم الاربعاء 17سيبتمبر

اليوم للاسف استيقظت في اسوأ وقت ممكن للعزابي انه يستيقظ فيه وهو بين العشاء والمغرب حيث ان كل المطاعم مقفلين ولاني توني جاي من الرياض الثلاجة جدا فاضية(يعنني دايم مليانه) بس حتى حليب مفيش فطلعت اهيم على وجهي بالسيارة ولسعادة حظي لقيت بيتزا ان فاتحة ومنها افطرت. اليوم شفتي في الاي ار كان اكثر من امس بس خلاص باعلنها المريضات الحوامل لاول مره (اول طفل) اسوأ مريضات ممكن الواحد يتعرض لهم في حياته يعني وقت الولادة خلاص بتموت وانواع الصراخ وتجي الطورائ ومعها امها واختها ويقولون لك  يادكتووووور حطها ع السرير بتموت ويالله يادكتور طلعها غرفة الولادة صراحة ما بقى الا اروح اكلم العميد حق الكلية عشان يسوي استثناء ويعطيهم شهادت طب عشان يبدأون يشتغلو معانا  ولما نفحصها نقولها عنق الرحم مقفل خلاص تسكت وكان ما كان فيها شي ابد ولا من زود السناعة بعد ترسل اختها تقول دكتور متى هي بتولد والله لو اعلم القدر يا اختي صدقيني ماكان دخلت كلية الطب لسبب واحد بس عشان مااقابلكم.

يوم الخميس 18 سيبتمبر

الام شديدة في بطني بعد وجبة السحور البارحة من البانوش فافطرت فطور خفيف وقررت اني ما اتسحر سحور جامد بعد فوقفت عند لوكروسان في طريقي الى الدوام الساعة 1 الليل باحثا عن مفن(كيكة صغيرة)لكن للاسف لما سالت البائع متى سويتوها قال من يومين ورحت لانوش اخذت حبتين كوكيز وحدة لي ووحدة للممرضة الي معاي ويالاخيبتي(من الخيبة) لما اكتشفت انها نفس النيرس الي قلت فوق انها اقل بروفشنال نيرس ممكن الواحد يشتغل معها واليوم بس تأكدت انو من جد عندها مشكلة عقلية الزبدة اليوم جتنا مريضة ودخل معها زوجها الى غرفة الطورئ حقت النساء والولادة حيث يوجد على الباب لوحتين كبار جدا مكتوب ممنوع دخول الرجال وكأن الاطباء مو رجال الزبدة لما دخل قامت النيرس الفاهية وقالت اطلع برا رفض استنجدت فيني وقلت له بكل برود لازم تطلع لانها منطقة نساء قال اذا جو(حضروا) مريضات اطلع. زلبت وبديت اخذ التاريخ المرضي من المريضة لانها مو شغلتي اطلع ازواج المريضات بس النيرس عصبت لان كلامها انكسر وما مشى دقت على الامن الي جو وقالو له اطلع رفض وقالهم انتو اطلعوا برا عيب عليكم زوجتي هنا وماادري كيف صار شد واخذ بالكلام الى فجأة قام زوج المريضة ودف رجل الامن وسكر باب الطورائ بظهره ورجل الامن الهزيل يحاول يدفع الباب بس مفيش فايدة  فاسمعه من برا يقول والله اني راح اكلم الشرطة وفعلا شوي الا اثنين عسكر من الشرطة وصلو ويقولون له اطلع برا وهو مو راضي سكروا الباب وانتظروه بالخارج جتني النيرس وقالت لاتسوي لها فحص اذا زوجها معها لانه ممنوع !! فقلت له (ممنوع وانا راح افحصها مع الممرضة) قال مفيش مشكلة وانا داخل بفصحها في غرفة الفحص الا هو يقولها بس بطنش يا مره يعني خليه بس يفحص بطنك. مشت هي وزوجها وجت الممرضة مبسوطة تقول سيارة الشرطة برا وبيركبونه معاهم بس اتوقع ان النيرس نصابة لاني بعد نص ساعة شفته عند الصيدلية.

ملاحظة:النيرس هاذي قد انضربت من قبل شاب جاي مع امه في احد شفتاتي معاها.

حمى الزواجات

في السنوات الاخيرة عندما يرغب بعض ممن اصطبغ سواد شعرهم بالرمادي بشئ ما يسارعون الى بعض الشيوخ واصحاب المشالح لايجاد طريقة لتحليله او جعلة مقبول اجتماعيا ومن ذلك أمور الزواج فمثلا قبل 7 سنوات اذا فجع الرجل امرأته وقال لها لقد قررت الزواج عليك تولول وتبكي اما الان اذا قال الرجل لأمراته سأتزوج عليك ستسأله زواج مسيار ولا مصياف ولاناسة ولا عادي ثم تولول وتبكي.

يعني من جد جتنا موضة زواج المسيار وكانت مصممة للشيبان الي ما يصبرون عن الحريم على قولتهم وزوجته عجزت(اصبحت عجوزا شمطاء) وما عاد تصلح فيروح ياخذ له وحدة مسيار كزوجة ثانية حيث ان الزوجة الجديدة تتخلى عن بعض من حقوقها الزوجية بس عادة مو النفقة يعني مواصفات الزوج المطلوب عبارة زوج بفيزة زيارة مفتوحة.

بعد ذلك انتشرت موضة جديدة اسمها زواج المصياف وهذا طبعا طلع لنا بعد موجة المطالبة بالمساواة بين الرجل والمرأة فأستفاد منه جنس الرجال وايظا جنس النساء. يعني انا مثلا رجل مطنوخ(عندي فلوس) وودي اسافر وام العيال تفشلني لانها ما ترضى تفصخ الشيلة ودابلتن تسبدي( مسببة لي مشاكل صحية) فعندي خيارين يا اكلم ام عبيد الخطابة واقولها شوفي لي وحده من بنات هذا البلد المعطاء وياليتها سمراء مو مره مره يعني قصدي برونزية وياليت يام عبيد تكون تتكلم انقليزي لان راح احضر اجتماعات وحفلات رسمية وابيها تبيض وجهي فيذاك والمهر الي تطلبة مستعدين وارتاحي يام عبيد قولي لهم مستعد من الخمسين الين سقف الميتين الف.

والخيار الثاني انه يروح هناك للبلد الي ناوي يتمشى فيها ويتزوج منهم طبعا هذا ما فيه  اي شي ابد لانه نوع من التعرف والاختلاط بالحضارات الاخرى وهذا اكبر دليل في وجه الي يقولون ان الشعب السعودي منغلق على بعضه.

طبعا لاياخذكم بالكم بعيد وتقولون اكيد البنت الي هناك مو مزبوطه ولا كيف تتزوج واحد من الباب للطاقة لا ابد يتزوجون عن طريق رجل صحيح ممكن تلقاه يتسلتح(يتسكع) في المطار او الفندق لكن عنده كرت عمل رسمي يقول انه يشتغل في وكالة زواج رسمية وعلى نفس البطاقة من وراء مكتوب انه موافق على هذه الشركة من قبل سلطات هذه الدولة وهذ اكبر دليل في وجه الي يقولون ان هذا نوع من الدعارة بغطاء شرعي. وهذا افضل من الي يسوونه الشباب الضايع والسرابيت لان الشباب يروحو لقوادين (عذرا على الكلمة) مايروحو لوكالات زواج حيث الستر والعفة عن الوقوع في الحرام وحيث الضمان الشامل انه بعد ال طلاق ستكمل المرأة عدتها ثلاثة أطهار.

طبعا ان قلت ان الرجل والمرأة يستفيدون من هذا الزواج نفس الشي المرأة تبي تسافر مثلها مثل الرجال فتشوف لها واحد محرم ومواصفته انه رجال طبعا وثانيا عنده شنطة سفر جاهزة وبالاخير يكون من النوع الخيخي وهو النوع الي ما يقول لها وين رايحة ووين جاية لانها رايحه تتمشى وتشم هواء وتسهر وتنبسط وماتبي واحد عقليته سعودية ومنغلقة. فمن هنا الي تبي تاخذني زواج مصياف عام 2009 بعد شعر مارتش الى شهر اكتوبر ما عندي مشكلة لاني احب اشم هواء:).

وفيه زواج المسفار لكن هذا علماء الدين يقولون انه مش مزبوط طبعا مو عشان المستفيد الاول هو الزوجة ولكن لانه محدد بمدة معينة.

الزواج هذا مادري من صممه لكن الهدف منه تسهيل امور الابتعاث للفتيات فلنفرض ان هند دكتورة شاطرة اوي بقسم الاورام وقررت تكمل دراستها بره وبما ان عندها العديد من الدرسات والاوراق العلمية لما قدمت على هارفرد قبلتها ومن الفرحة لملمت اوراقها وراحت التعليم العالي عشان يبعثوها على حسابهم لانها ناوية ترفع راس البلد بس الموظف قالها انتي ما استوفيتي الشروط قالت كيف ما استوفيت الشروط فقال لها وين رجلس؟؟ (يعني زوجك). ومن محلي هذا اهنئ وزارة التعليم على هذا الشرط يعني من جد كيف بناتنا يروحون يهيتون(يضيعون) صحيح ان جامعة قوية مثل هاذي تعتقد ان هند تستطيع ان تقدم لهم شي بس هم وش يعرفهم عن عادتنا و تقاليدنا وصحيح ان اطفال عفوا شباب ال 18 سنة المبتعثين بعد الثانوية يسافرون لحالهم لكن هذولا عندهم لمسة من حكمة الرجولة. فمالها حل الا انها تدور له واحد قدع يحب يسافر وتاخذه معاها.

واخير بما اننا نحترم كبار السن طبعا اقصد الي فوق ال80 وحواليها طلعنا بزواج جديد اسمه زواج الوناسة وهذا يعني مدري كيف اشرحة بس الهدف الاساسي منه ان العجوز هذا ياخذ له وحدة توسع صديرة(تصغير صدر) مع تخليها عن شرط المعاشرة طبعا الزوجة هاذي لاتقولون  (وش تبي بذا الشايب واكيد حاطة عيونها على فلوسه) ابد ابدا ابد متأكد انها حبوبة وهدفها انها تعطي للمجتمع وتزرع الابتسامة في وجه العجوز قبل ما يرحل عن دنيانا الله يجزاها خير قاعدة تضيع زرهة شبابها في خدمة أبناء هذا الوطن.

واختم بمرضى نفسيين يتقدمون للزواج من قاصرات ويوافق عليهم مرضى اخرون يمكلون عقلاً اصغر من عقل طفلته التي لم تتعدى عشر سنوات وكما اطلقت عليه الكاتبه منى المالكي زواج المصغار واصبحنا نقرأ بين فترة واخرى عن سبعيني يتزوج فتاة عمرها 8 سنوات وشاب ينقذ اخته الصغيرة من ستيني (مفروض خبر واحد فقط من هاذي الاخبار يهز المجتمع ) طبعا ما عندي الا نصيحة واحدة لهولاء الرجال احذر ثم احذر انك تاخذ شهر عسلك بامريكا او واروبا لاني اتوقع انهم ما رايح يرجعونك.

خلاص بطلنا تلفزيون

الزمان:قبل أسبوع من الان

المكان:شقتي المتواضعة

اتصفح موقع جريدة الوطن واتفاجأ بوجود مقالين بنفس اليوم من اصل عشر مقالات واحد هاذين المقالين معقبا لموضوع كتب البارحة والثلاث مقالات تتكلم عن مناحي (شخصية تلفزيونية في مسلسل رمضاني يرتقي بكلمة سخيف) وتنتقده هذه المقالات لتلميحة عندما سئله احد الشخصيات في المسلسل (وين احط شريحة جوالي) رد مناحي في الي انت خابره قاصد بها احد تجاويف جسمك.

الزمان: قبل أمس

المكان: سيارتي المصونة

استمع لقناة البي بي سي الاخبارية املا في تطوير الlistening skills خاصة للهجة البريطانية ماعليكم مني الزبدة كنت مفهي وسمعت شي السعودية وركزت بس للاسف راح الخبر وبعد ساعة عاد نفس الخبر وكنت مركز وكان يتكلم عن القاضي اللحيدان وكيف انه لايمانع قتل اصحاب القنوات اللااخلاقية. وفي هذا اليوم ايظا عبدالله السدحان في مقابلة على قناة البحرين الاذاعية مدافعا عن مسلسلة الجديد كلنا عيال قرية وكيف ان الناس تسرعت بانتقادها له وان عليهم الصبر.

الزمان: الوقت الحاضر (14سيبتمبر)

المكان:صالة بيت أهلي بالرياض

مرة اخرى اتصفح موقع جريدة الوطن وفي الصفحة الاولى موضوع بعنوان الشيخ اللحيدان يشرح فتواه عن ملاك القنواة الفضائية وايظا في الصفحة الاولى نقرأ فايز المالكي يعترف بخطئة في التلفظ بعبارات غير لائقة.

سؤالي هل يحق لنا انتقاد البرامج او المسلسلات التلفزيونية كما في كتاب (بشد التاء) جريدة الوطن او قتل اصحاب القنوات الماجنة والتخلص من اصول الشر فما يصير فيه مسلسلات من اصلة.انا صراحة ما ادري والموضوع هذا رابكني ومسبب لي كونفيوجن شديد(بشد الياء كما يقولها أخواننا من السودان).

لما امسك ريموت التلفزيون واحرك اصبعي باتجاه زر تغيير القنوات ينتفخ اصبعي من التعب والارهاق واظطر اغطسه بموية حارة نهاية اليوم لكثرة القنوات والمسلسلات. فالي منزعج من قناة او مسلسل ماحد ضربك على يدك وقال لك شوفة انت رحت ودورت على تلفزيون ودفعت فلوس وبحثت عن ريسيفر ممتاز وصحن دش وماننسى ايضا العامل حق تركيب الصحن بعدين قعدت تبحث عن قنوات ورتبتهم ترتيب ابجدي وحطيت لك مفضلة بافضل قنواتك وبعدين ضيعت ساعة على المسلسل هذا.

صحيح التلفزيون اصبح جزء من حياة اغلب الناس وموجة لجميع الطبقات ولو سالت كم عدد القنوات لتغير الجواب باتجاة رقم اعلى كل ساعة الي اريد اوصل لة هو اذا كان بعض الناس يجد نكتة مناحي ماصخة وغير ملائمة لجو عائلتة الخاص وما ربى عليه (من التربية) فقد يجدها غيرة انها مضكحة ولا عيب فيها. فهل يحق لي التهجم على هذه الشخصية البدوية ودعوتها الى العودة الى تقاليدنا وعادتنا (الي انا شخصيا لم استطع تعريفها للان)؟؟

ومن ناحية اخرى المتابعين يمثلون المستهلك والمسلسلات تمثل المنتج والقنوات هي نقاط البيع او الموزع. اذا نظرت لها من الناحية هاذي يحق للجميع انتقادها لان المنتج هذا موجه لهم وبلغتهم وسيتبع بالنهاية اعلى (من الزعاج) وليس اكثرية الاصوات.

في النهاية القاضي اللحيدان في شطحتة المفاجأة اثار عاصفة من الاسئلة في رأسي التي سألتها احد الاشخاص الفاهين ممن تربطني بهم علاقة قديمة وقالي ليش تبغى تعرف قلت ودي احدد موقفي بس واريد افهم بعض الاشياء.

قال لي: تعرف احسن موقف ايش؟

انا: ايش

هو موقف الطزززززز