فجعتوني والله فجعتوني
يناير 31, 2009
اليوم قبل شوي صار لي موقف من المواقف الي من جد يطلق عليها مواقف بص حضرتك (يعني مدري وش تبي). بما اني عزابي و الكثير من العزابية يستخدمون اكياس الملابس الجاية من المغسلة بعد ربطها من الاسفل لحمل ملبسهم المتسخة مرة اخرى الى المغسلة.
بعد تجمع الكثير من الملابس الغير نظيفة سويت التكنيك الي فوق ومليت الكيس فخفت ينقطع وجبت كيس زبالة اسود وحطيت كيس الملابس فيه (ادري ام الخنبقة والخنبقة هي التلفيق) يعني صارت ملابسي في كييس لونه بيج والكيس البيج حطيته في كيس زبالة اسود.
وفجأة وبلا اي مقدمات قررت اني احط الكيس في السيارة من الحين (الساعة 3 الفجر) عشان الصباح راح اكون شايل معاي اغراض ولسبب اخر وهو ان سيارتي موقفها في الشارع المقابل يعني لازم اقطع الشارع العام ومالها داعي على زحمة الصبح شايل كيس ثقيل وقاطع الشارع.
فنزلت من الشقة شايل كيس اسود منتفخ وقطعت الشارع وفتحت شنطة السيارة وحطيت الكيس الا وفجأة وبلا مقدمات مرة أخرى وقفت جنبي سيارة صغيرة وفيها اثنين شباب اشكالهم شبهه واحد منهم لاف شال ولابس ايس كاب بعني اثنين فاضين يتمشون الفجر. سويت اني ماشفتهم ومشيت لكن على مين. نزل السواق من السيارة وقال لو سمحت وايظا يعنني ماسمعت وبالعربي صرت اصم وابكم. والي مايعرفني انا شاب مسكين صغير شكله ابد ما يخوف
واصر السواق: لو سمحت
انأ : امرني ياخوي
هو: تعال ابيك
طبعا انا توقعت شيئين يا انه بيشحذ مني فلوس او بيسطرني وبياخذ مني فلوس طبعا زلبته ومشيت الا فجأة قرب مني ورفع قميصة( لابروح بالكم بعيد) طبعا يوم رفع قميصة دخل يدة وسحب مسدس بعدين يوم شافني وقفت رجعه لجرابة (حامل المسدس) بس استمر ماسكة بيدة اليمين في وضع الاستعداد. هنا انا من جد ضعت في ظلمات الخوف و قلت وش ذا الي يستهبل على الفجرية.
هو: وش الكيس الي معاك؟
انا: بدأت استعيد رباطة جئشي وقلت بس مين معاي؟
هو: المباحث الجنائية بدون نفس وكمل كلامة وقال وش الكيس الي حطيته بالسيارة؟
انا: ملابسي!
هو: افتح الشنطة وايظا بدون نفس
وبكل ادب فتحت الشنطة لانو مش انا الشخص الي معاه المسدس
وقال: افتح الكيس
وفتحته وخليته يشوف بعدين قال سيارتك وضعها سئ (ماغسلتها منذ شهرين بس وش دخل اهله) وكمل عطني اثباتك قلت اثباتي بالشقة وبعدين استخدمت الكلمة السحرية الي اكتشفتها من شهرين وهي (انا طبيب بالمستشفى التعليمي بالخبر) تفضل معاي فوق واعطيك اثباتاتي.
ناظرني من فوق لتحت بعدين قال روح الله يستر عليك.
يعني معليش بس من جد معليش فجعتني الله يفجعك هذا اسلوب بالله !!!!!!
Entry Filed under: انا والزمن. .
4 Comments Add your own
Leave a Comment
Some HTML allowed:
<a href="" title=""> <abbr title=""> <acronym title=""> <b> <blockquote cite=""> <cite> <code> <pre> <del datetime=""> <em> <i> <q cite=""> <strike> <strong>
Trackback this post | Subscribe to the comments via RSS Feed
1.
ucf | يناير 31, 2009 at 6:27 ص
الله يعز الحكومة.
Did you thank for him for saying:
الله يستر عليك
?
2.
ucf | يناير 31, 2009 at 6:39 ص
بعد ما فكرت فيها شوي، قسم بالله إني إنقهرتلك يا اخوي!
ليتني كنت معك! مدري وش بسوي، بس يا ليتني كنت معك يا عبدلله.
3.
Hadi | فبراير 1, 2009 at 4:12 ص
الحمد لله جت على كذا يا عبدلله …
وحلوه مسكة المسدس …
4.
A | فبراير 2, 2009 at 10:51 م
ucf
يا ارهب اخو بالعالم
امين الله يعز الحكومة
Hadi
اول شي تو مانور البلوق وياهلا ويامرحبا
والحمدالله على كل حال
وصحيح مسكة المسدس شي ثاني بس الشيخ مفروض يعرف عن نفسة من البداية مو ينتظرني اسأل.