شهر زمان

في زمن اغبر طلب معلم مادة التعبير من فيصل اخوي في سنتة الاولى في المدرسة الابتدائية كتابة موضوع عن المدرسة فقام فيصل ابو الخيال الواسع بكتابة التالي: احب المدرسة و احب الطاولة واحب السبورة واحب المساحة واحب الكرسي واحب المقلمة والقلم واحب الدفتر…. وكل ماوقعت عيناه عليك في تلك الساعة حتى ملأ صفحة دفتر كاملة.

في لحظات هنائي ومن حين لاخر كنت امدح المنطقة الشرقية ومدى حبي لها لكن خلال داومي لشهر كامل شارف على نهايتة هنا في الرياض اكتشفت اني اعشق المنطقة الشرقية ولو طلب مني اي مدرس مادة تعبير كتابة موضوع لملئت له دفتر من احب واحب واحب عن الخبر والدمام واهلهما.

طبعا كنت اتوقع اني راح اواجه مشكلة مع المرضى في الرياض من ناحية تكبر وصعوبة في التعامل لكن اقسم بالله انهم غلبانين طبعا لا انسى اني في مستشفى يتبع لوزارة الصحة حيث ان كثير من المرضى يا من الطبقة تحت المتوسطة ممن لايمكلون فلوس للمستشفيات الخاصة او من الطبقة المتوسطة التي تبحث عن كفائات ودكاترة جيدين وايظا كثير من المرضى المنومين محولين من مستشفيات خارج الرياض.

من الاشياء المؤلمة

لما رجعت من كينيا قبل سنتين قلت ليوسف اخوي ان الناس داقهم الفقر الشديد الشديد (حايس ابوهم ) الى حد انهم اصبحوا لطفاء ولا فيهم حيل واقسم بالله العظيم لي سبع شهور من صرت طبيب امتياز(لسه بيبي) والفترة الاولى منها كانت في الشرقية وما شفت هذا الشي الا هنا في الرياض يعني ناس جدا جد غلبانين يعني لو قلت له لف يمين لف ولو قلت له لف يسار لف وفيه ناس تجينا من بعد الف كيلو بس عشان تراجع في عيادة يعني والله حاجة مؤلمة طبعا الي يفضخ القلب (كلمة تستخدم هنا وتعني يقطع القلب من القهر)انك تجي الف كيلو او حتى ثلاثمئة كيلو لعيادة استشاري في احد التخصصات الدقيقة وتلقى واحد ثاني جالس على كرسية وتقول له وين سعادة الدكتور فلان يقول لك والله في اجازة والحل اننا نعطيك موعد ثاني لما يجي الشيخ.

من الاشياء الجيدة

المستشفى هنا من جد فيه احترافية في التعامل بين الموظفين يعني رجل الامن يقوم بشغله كامل ولا له دخل باحد والممرضة ما تتدخل بشغل الطبيب والعكس وطبيب التخدير ما يتفلسف على الجراح والعكس يعني كل واحد عارف شغلة ولا له دخل بالثاني بس من جد خلية نحل.

ومن الاشياء الجيدة لما تكون مناوب توفر لك المستشفى ثلاث وجبات صحيح اكل ابو طقة لكن اكل.

ايظا فيه باصات رايحة جاية من المواقف لمبنى المستشفى.

المحاضرات والكورسات متوفرة بكثرة في المستشفى وصراحة شغل نظيف.

واخر شي كطبيب امتياز ستتاح لك الفرصة للعمل مع استشاريين بكثرة عكس مستشفانا الي كنا نشتغل مع الاطباء المقيمين

من الاشياء الغريبة

طبعا منذ نعومة شاربي  وانا اواجه مشكلة في التحدث مع الجنس الاخر يعني لما ابدي سالفة ونادر ما اكون انا البادئ تنتهي بسرعة رهيبة ومخيفة. هنا واجهت عدد لابأس به من الفيميل ستاف و مع استغرابي الشديد يحبون يدقون حنك (يسولفون) سوالف عامة ويخشون بعين الواحد طبعا صراحة توقعت ان البنات هنا راح يكون اكثر تحفظا من الشرقية لكن كذب توقعي.

الخلاصة

يبقى المستشفى التعليمي ببلاطة الازرق القديم بيتي  وله معزة خاصة بقلبي.