غنم xغنمxغنم

قدر الله علي وبقى كم اسبوع وتنتهي صلاحية بطاقة أحوالي ولخوفي الشديد انهم يقفلون حساباتي البنكية وماعاد اقدر اضارب في البورصات العالمية واخسر جزء من اموالي وقد اتسبب بانهيارات مالها داعي في وقت الاقتصاد العالمي في امس الحاجة الى ناس مثلي وشرواي قررت اني اعجل بتجديدها.

لبست ثوبي وشماغي وشخصت وطلع شكلي كاني احد ابناء الجاليات العربية لما يلبس شماغ بس ماعلينا الرجاجيل مخابر مش مناظر على قولتهم الزبدة اخذت ملف علاقي اخضر حطيت فيه اوراقي وصوري الشخصية وانطلقت باتجاه احوال الدمام.

الجو ساخن ومشمس لابعد درجة مافيه اي لوحات ارشادية فدخلت من بوابة ولقيتها مقفلة وكان معاي شخص يبدو من ملامحة انه من الاعراب وبدال ضرب المشوار الى البوابة الاخرى قرر استخدام جينات القرد لدية والقفز من على السور وكملت مشواري باتجاه البوابة الاخرى وكغنمة تتبع القطيع اشوف وين الزحمة واروح لانو مافيه اي لوحة فقط لوحة على باب مكتوب رئيس قبائل الربع الخالي او شي مثل كذا لقيت عسكري وسلمت مارد وسلمت مارد احترمت نفسي وماعاد سملت مديت الملف الاخضر لانه الشي الوحيد بالوان هناك وطبعا اخواني السعوديين انواع السقطات علي (يعني يتجاوزني كاني جدار) ومديت ملفي لسعادة فضيلة اللواء الركن الشيخ العسكري وبعد كم دقيقة اخذه وتصفحة بسرعة وعطاني رقم رقمي كان 490 والرقم ع الشاشة 133 ومكتوب ع الورقة الوقت المتوقع للانتظار ستة ساعات واربعة واربعون دقيقة مع انو بتكون الاحوال مقفلة بعد ستة ساعات.

بدأت رحلة الانتظار وبطريقة ما جاء دوري رحت لشباك 3 سلمت ومارد وطبعا فيه اثنين قبلي قاعد يخلص اوراقهم يعني مادري ليش ناداني الشيخ اخذ ملفي وشخبط تحت قال روح شباك 6 رحت ولا سلمت اخذ ملفي وشخبط هو الاخر وقال خلاص روح للصادر والوارد عشان يجيبون ملفك من مصدر البطاقة قلت ايش؟؟ قال عشان يجيبون ملفك من مصدر البطاقة قلت يعني مافيه بطاقة لي اليوم قال لا. امنت بالله ورحت للصادر والوارد بعد سوال كم مراجع عن محل هذا المكتب لقيت واحد لوتبوني احلف انهم غاصبينه يشتغل او انه يشتغلل ببلاش قال لي هات الملف وراجعنا بعد 3 اسابيع قلت انا مش فاضي بعد 3 اسابيع (يعنني) قال روح لمدير الاحوال. شخصت ورحت لسعادة المدير وحكيت له السالفة قال لو انت متزوج كان طلعتها لك الحين قلت خلاص زوجني بس اخلص قال حلك الوحيد انك  تكلم واحد في مكتب الاحوال الي طلعت بطاقتك منها عشان يرسل ملفك خلال اسبوع. والله لو يرسلونها على ددسن يدفونه اربعة رجال كان جات قبل اسبوع.

نسيت الموضوع وجلست اربعة شهور تعرفون لازم وقت اجدد فيه نفسيتي رحت الاحوال الاسبوع الي راح وعلى مكتب الصارد والوارد تعرفون صرت ادل قلت عطني ملفي قال ملفك جاء لكن الارقام خلصت تعال بكرة قلت ياخي انا انتظرت وصفيت واحترمت نفسي قبل فترة عاد خلصوني وكأني اكلم جدار. رحت لصديقي  مدير الاحوال قلت له السالفة قال روح كلم العسكري يمكن يعطيك رقم رحت لسعادة العسكري والله حسيت اني ناموسة تحاول تلفت انتباهه وهو معطيني خامس قلت ياخي ابغى رقم انا مواطن جاكم في دوامكم الرسمي ولا قبل لايتنهي باربع ساعات يبي يخلص امورة طبعا بدون اي نفس قال مافيه ارقام تعال بكرة قلت ياعزيزي انا مستأذن من الدوام وماقدر بكرة بس رش فليت و زلبني الشيخ.

رجعت للمدير قلت له رفض العسكري واذا بتخدمني باكون شاكر واذا لا تراكم بطيتو كبدي. تكرم علي واخذني قبل كل الناس وعطى ملفي لواحد عند شباك 4 شخبط وقال روح صور. اخيرا اخيرا لالالا مش قادر اصدق اكيد راح ابتسم في الصورة من الفرحة رحت مكتب التصوير وعطيته الفايل طبعا هذا الكلام عشرة وربع قال تعال بعد الصلاة جيت بعد الصلاة وصورت بعد انتظار ساعة وربع وبعدين قالوا تعال بكرة خذ البطاقة.

الزبدة مفروض كل عشرة سنين تعطينا الدوالة اجازة رسمية لتجديد بطائقنا 3 ايام تجديد و7 ايام لتجديد النفسية وايظا انصح بوضع طبيب نفسي عند باب الدخول لتجهيزي للصدمة واخر عند باب الخروج (هو نفس باب الدخول) لتقييم حالتي ومحاولة اصلاح مايمكن اصلاحة.

انصح اخواني المراجعين كم نصيحة الاولى لنحترم بعض ونحترم الطوابير والثانية ارموا كرامتكم عند الباب لانك هناك راح تعامل كغنمة مالم تكن لديك بعض المعارف عندها ستتطور الى ادمي في احد البلدان المتطورة.

واخيرا لاتنسوا الدعاء التالي:اللهم إني أعوذ بك من الهم والحزن والعجز والكسل والبخل والجبن وضلع الدين وقهر الرجال.

شهر زمان

في زمن اغبر طلب معلم مادة التعبير من فيصل اخوي في سنتة الاولى في المدرسة الابتدائية كتابة موضوع عن المدرسة فقام فيصل ابو الخيال الواسع بكتابة التالي: احب المدرسة و احب الطاولة واحب السبورة واحب المساحة واحب الكرسي واحب المقلمة والقلم واحب الدفتر…. وكل ماوقعت عيناه عليك في تلك الساعة حتى ملأ صفحة دفتر كاملة.

في لحظات هنائي ومن حين لاخر كنت امدح المنطقة الشرقية ومدى حبي لها لكن خلال داومي لشهر كامل شارف على نهايتة هنا في الرياض اكتشفت اني اعشق المنطقة الشرقية ولو طلب مني اي مدرس مادة تعبير كتابة موضوع لملئت له دفتر من احب واحب واحب عن الخبر والدمام واهلهما.

طبعا كنت اتوقع اني راح اواجه مشكلة مع المرضى في الرياض من ناحية تكبر وصعوبة في التعامل لكن اقسم بالله انهم غلبانين طبعا لا انسى اني في مستشفى يتبع لوزارة الصحة حيث ان كثير من المرضى يا من الطبقة تحت المتوسطة ممن لايمكلون فلوس للمستشفيات الخاصة او من الطبقة المتوسطة التي تبحث عن كفائات ودكاترة جيدين وايظا كثير من المرضى المنومين محولين من مستشفيات خارج الرياض.

من الاشياء المؤلمة

لما رجعت من كينيا قبل سنتين قلت ليوسف اخوي ان الناس داقهم الفقر الشديد الشديد (حايس ابوهم ) الى حد انهم اصبحوا لطفاء ولا فيهم حيل واقسم بالله العظيم لي سبع شهور من صرت طبيب امتياز(لسه بيبي) والفترة الاولى منها كانت في الشرقية وما شفت هذا الشي الا هنا في الرياض يعني ناس جدا جد غلبانين يعني لو قلت له لف يمين لف ولو قلت له لف يسار لف وفيه ناس تجينا من بعد الف كيلو بس عشان تراجع في عيادة يعني والله حاجة مؤلمة طبعا الي يفضخ القلب (كلمة تستخدم هنا وتعني يقطع القلب من القهر)انك تجي الف كيلو او حتى ثلاثمئة كيلو لعيادة استشاري في احد التخصصات الدقيقة وتلقى واحد ثاني جالس على كرسية وتقول له وين سعادة الدكتور فلان يقول لك والله في اجازة والحل اننا نعطيك موعد ثاني لما يجي الشيخ.

من الاشياء الجيدة

المستشفى هنا من جد فيه احترافية في التعامل بين الموظفين يعني رجل الامن يقوم بشغله كامل ولا له دخل باحد والممرضة ما تتدخل بشغل الطبيب والعكس وطبيب التخدير ما يتفلسف على الجراح والعكس يعني كل واحد عارف شغلة ولا له دخل بالثاني بس من جد خلية نحل.

ومن الاشياء الجيدة لما تكون مناوب توفر لك المستشفى ثلاث وجبات صحيح اكل ابو طقة لكن اكل.

ايظا فيه باصات رايحة جاية من المواقف لمبنى المستشفى.

المحاضرات والكورسات متوفرة بكثرة في المستشفى وصراحة شغل نظيف.

واخر شي كطبيب امتياز ستتاح لك الفرصة للعمل مع استشاريين بكثرة عكس مستشفانا الي كنا نشتغل مع الاطباء المقيمين

من الاشياء الغريبة

طبعا منذ نعومة شاربي  وانا اواجه مشكلة في التحدث مع الجنس الاخر يعني لما ابدي سالفة ونادر ما اكون انا البادئ تنتهي بسرعة رهيبة ومخيفة. هنا واجهت عدد لابأس به من الفيميل ستاف و مع استغرابي الشديد يحبون يدقون حنك (يسولفون) سوالف عامة ويخشون بعين الواحد طبعا صراحة توقعت ان البنات هنا راح يكون اكثر تحفظا من الشرقية لكن كذب توقعي.

الخلاصة

يبقى المستشفى التعليمي ببلاطة الازرق القديم بيتي  وله معزة خاصة بقلبي.

فجعتوني والله فجعتوني

اليوم قبل شوي صار لي موقف من المواقف الي من جد يطلق عليها مواقف بص حضرتك (يعني مدري وش تبي). بما اني عزابي و الكثير من العزابية يستخدمون اكياس الملابس الجاية من المغسلة بعد ربطها من الاسفل لحمل ملبسهم المتسخة مرة اخرى الى المغسلة.

بعد تجمع الكثير من الملابس الغير نظيفة سويت التكنيك الي فوق ومليت الكيس فخفت ينقطع وجبت كيس زبالة اسود وحطيت كيس الملابس فيه (ادري ام الخنبقة والخنبقة هي التلفيق) يعني صارت ملابسي في كييس لونه بيج والكيس البيج حطيته في كيس زبالة اسود.

وفجأة وبلا اي مقدمات قررت اني احط الكيس في السيارة من الحين (الساعة 3 الفجر) عشان الصباح راح اكون شايل معاي اغراض ولسبب اخر وهو ان سيارتي موقفها في الشارع المقابل يعني لازم اقطع الشارع العام ومالها داعي على زحمة الصبح شايل كيس ثقيل وقاطع الشارع.

فنزلت من الشقة شايل كيس اسود منتفخ وقطعت الشارع وفتحت شنطة السيارة وحطيت الكيس الا وفجأة وبلا مقدمات مرة أخرى وقفت جنبي سيارة صغيرة وفيها اثنين شباب اشكالهم شبهه واحد منهم لاف شال ولابس ايس كاب بعني اثنين فاضين يتمشون الفجر. سويت اني ماشفتهم ومشيت لكن على مين. نزل السواق من السيارة وقال لو سمحت وايظا يعنني ماسمعت وبالعربي صرت اصم وابكم. والي مايعرفني انا شاب مسكين صغير شكله ابد ما يخوف

واصر السواق: لو سمحت

انأ  : امرني ياخوي

هو: تعال ابيك

طبعا انا توقعت شيئين يا انه بيشحذ مني فلوس او بيسطرني وبياخذ مني فلوس طبعا زلبته ومشيت الا فجأة قرب مني ورفع قميصة( لابروح بالكم بعيد) طبعا يوم رفع قميصة دخل يدة وسحب مسدس بعدين يوم شافني وقفت رجعه لجرابة (حامل المسدس) بس استمر ماسكة بيدة اليمين في وضع الاستعداد. هنا انا من جد ضعت في ظلمات الخوف و قلت وش ذا الي يستهبل على الفجرية.

هو: وش الكيس الي معاك؟

انا: بدأت استعيد رباطة جئشي وقلت بس مين معاي؟

هو: المباحث الجنائية بدون نفس وكمل كلامة وقال وش الكيس الي حطيته بالسيارة؟

انا: ملابسي!

هو: افتح الشنطة وايظا بدون نفس

وبكل ادب فتحت الشنطة لانو مش انا الشخص الي معاه المسدس

وقال: افتح الكيس

وفتحته وخليته يشوف بعدين قال سيارتك وضعها سئ (ماغسلتها منذ شهرين بس وش دخل اهله) وكمل عطني اثباتك قلت اثباتي بالشقة وبعدين استخدمت الكلمة السحرية الي اكتشفتها من شهرين وهي (انا طبيب بالمستشفى التعليمي بالخبر) تفضل معاي فوق واعطيك اثباتاتي.

ناظرني من فوق لتحت بعدين قال روح الله يستر عليك.

يعني معليش بس من جد معليش فجعتني الله يفجعك هذا اسلوب بالله !!!!!!

الطلاق مرتان

السلام عليكم

هذا ثاني مره اترك البلوق فترة طويلة وانشالله بتكون الاخيرة. لان الطلاق مرتان واذا رجعني وورد برس المره هاذي المره القادمة ما اتوقع.

السبب الرئيسي لهجري البلوق اني عادة اكتب لما اكون متضايق من شي لكن ولله الحمد كانت الشهرين الاخيرين جيدة بوجود طبعا بعض اللحضات التذمرية وان لم توجد بحثت شخصيتي النكدية عنها.

على كل حال عودتي يوم العيد لاتعني ضيقتي من العيد لكن قلت ايش وقت اكثر بركة من هذا للعودة.

فكل عام انا وانتم وكل مسلم وغير مسلم بالف خير وصحة وعافية وسلام. والله يسهل اليوم هذا على الخرفان اما بذبح سهل سريع او بيوم ممتع

اللهم لك الحمد

السلام عليكم

في حياتي لم اشعر بالم جسدي يذكر الامرتين,

طبعا ما اعرف ايش السبب يمكن فعلا لم اتعرض لاي الام شديد او ال pain threshold عندي عالي (احلى يا قوي) , المره الاولى كانت العام الماضي عندما كنت العب كورة في جامعة البترول وتعرضت لضربة على الجنب الايمن من احد المصارعين بالفريق المنافس وشعرت بالام لم اشعر بها من قبل حتى توقعت انو راح يكون عندي hematouria (دم بالبول) لكن طلعت سليمة وكنت اتدلع مثل مايقول حسن.

المره الثانية كانت تقريبا قبل 10 ايام لما كنت استعد للخروج من الشقة الصباح وفجأة وبلا اي مبررات قررت اني اسوي شاي شغلت الغلاية وعلى بال مالبست الا الموية بدت تغلي رفعت الغلاية وحطيتها على التلفزيون وما امداني التفت الى طاحت على الارض رفعت رجلي اليسري وانسلقت رجلي اليمين طبعا على طول غسلتها.

قسم بالله لم اشعر بالم اشد بحياتي من الالم هذاك يعني من جد الحرق ورطة تغسله راح يألمك تغطيه ايظا يألمك لبست الكروكس (الصندل) وعلى الدوام رحت طبعا كنت اقول في السيارة الحمدالله جت على شي بسيط واحمرار بس لما دخلت المستشفى زاد الالم رحت ع الطورائ ولما طلعت رجلي كانت انواع البلسترز(الفقاقيع) سوو لي دريسنق مثل وجيههم وبعدها رحت لدكتور بلاستك فوق وقصقص (قطع)لي البلسترز وسوا لها دريسنق ارتب.

الشاهد من السالفة اني كنت عايش حياتي سعيد وسليم امشى واطلع الدرج وانزل واسولف بس ماكنت مقدر للنعمة الى انا فيها وماخذها for granted واي شي ماله اي قيمة ينغص علي مزاجي.

ومتأكد فيه ناس ما تمشي على كراسي متحركة وتقول عطني الامك واعيش معها كل يوم بس ارجع امشي وفيه ناس ماتحركت من سريرها لسنوات طويلة تتمنى بس تجلس او ترجع تمشي لو بلا مال او وظيفة او عائلة بس يهيم في الطرقات اهم شي يتحرك ويشم الهواء ويحس بحرارة الشمس ويسمع الاصوات بالشارع ويحس بالمطر لما ينزل وفيه ناس تتمنى بس انها توصل لدورة المياة فقط وراح يكونو مقدرين جدا لذلك .

بس من جد كونك انسان سليم معافي بلا الام ما اتوقع انو فيه اي سبب يمنعك من وصولك للي تريدة ولا اتوقع انو فيه اي شي ممكن يسبب لك هم شديد لانو مهما صار نعم مهما صار صحتك لسه موجودة وتقدر تبدي من جديد.طبعا الانسان نساي (بشد السين) بس اتمنى اني ما انسى واستمر كذا.

فاللهم لك الحمد والشكر عدد خلقك ورضا نفسك وزنة عرشك ومداد كلماتك اللهم لك الحمد على كل شي علمناه او لم نعلمة اللهم ادم علينا الصحة والعافية وكل خير يارب ياكريم.

يوميات

قررت اني اجرب(مجرد تجربة) واكتب يومياتي الي هي احداث اكثر من ان تكون خواطر او عواطف فهاذي يومياتي للخمسة ايام الي راحو.

يوم الاحد نهاية يوم 14 سبتمبر

صحتني امي على اذان المغرب نزلت تحت وافطرت مع العائلة فيصل اخوي في جدة طبعا الشعور جدا رهيب مو رهيب لان اخوي بجدة ولكن رهيب انك تلقى فطور جاهز وبعد صلاة العشاء طلعت للنادي رجعت البيت ركبت سيارتي ولحقت العائلة لبيت عمي الي ماكنت ابد متحمس اني اروح له لاشتهارة بكونه العم الكاش (مو فلوس ولكن اسلوب) يعني يخش بعينك وابد مو فريندلي (ودود) طبعا رحت عشان خاطر ابوي ولا عمي مو داري اني في الرياض تعشينا وبعد العشاء دخلت في المجلس ودخل عمي وراي وجابو الشاهي الا ابوي توه طالع من المقلط وقال لعمي يالله انا استئذن طبعا هنا تلقيت لطمة نفسية شديدة على خدي الايسر لتوهيق ابوي ولاضطراري للجلوس لوحدي مع عمي صبيت لنا شاهي والسكوت الغير مريح كان المسيطر على الجو واول ما خلص الفنجال بدقائق قلت يالله انا استئذن ورد علي رد لطيف وغريب قال بدري شفتو كيف كلمة عادية مثل هاذي تعتبر لطافة الزبدة قلت من عمرك. اخر الليل كلمني صاحب قديم كنت مواعدة من امس فاضطريت اطلع معاه وكان مزعج بشكل غريب حيث انه يملك وجهة نظر لكل شي في الكون وما امزح لما اقول كل شي يعني لو قلت له وش رايك في الاحتباس الحراري وتأثيره على حشائش السافانا ماراح يتردد ابد قبل لايبدئ خطبته العصماء ويمكن يعطيني لستة باسامي المسؤلين عن هذه الظاهرة.

يوم الاثنين 15 سيبتمبر

اليوم عرفت اني ملخبط ولازم ليل الثلاثاء (غدا) اكون بالدمام وكنت على بالي راح اجلس يوم زيادة بالرياض لكن لعلها خيرة. اليوم فتحت عيوني الساعة اربعة طلعت وسولفت مع امي شوي بعدين قرأت الجرايد مع ابوي (ما نقرأ الجريدة سوا ولكن في نفس الغرفة) وبعد الفطور رجعت انام صحيت عشرة وطلعت للنادي  والي عرفت منه ان بعض شباب الرياض فيهم نوع من الجلافة وبكلمة أخرى وقاحة يعني ما ادري اذا انا كنت لابس طاقية الاخفاء ولا مكتوب على جبهتي (لاتأخذ هذا الشخص بشكل جدي) لانو اكثر من جهاز وانا اتدرب عليه يجون ثلاث شباب ومره شابين مع بعض ويخشون علي ويبدأون يتدربون ولا متحمسين ويصارخون لبعض( يالله يا بطل ما بقى شي ) بعدين رجعت البيت و كلمت أحمد زوج اختي لاننا كنا متواعدين وطلعنا سوا وتعشينا بمطعم مكسيكي وصراحة استمتعت بالطلعة وفاجأني بسوال غريب لما قلت له اننا لازم نناوب بالمستشفى ونجلس فيها اربعة وعشرين ساعة قال طيب ما فيه غرف عوائل للدكاترة المتزوجين قلت له لا لانها بس اربع وعشرين ساعة .

يوم الثلاثاء 16 سيبتمبر

مشيت من الرياض الساعة ثمانية مساء باتجاه محطتي  التالية الخبر بعد سفرة عامره بالحلويات شاركتها مع العائلة وصلت تقريبا الساعة 12وكنت لابس السكرب سوت (لبس المستشفى) من البيت في الرياض فرحت المستشفى على طول لان دوامي راح يبدأ الساعة 2 تسكعت قليلا مع حسن بعدها تعشينا او تسحرنا حاليا اكتب من غرفة الطورائ مع اقل بروفشانال نيرس ممكن الواحد يشتغل معها عادي اكلمها وتزلبني من جد فاهية والحين هي ام الازعاج على التلفيون فيه مشكلة دم ما وصل لمريضة تو دخلناها. الان الساعة 6 صباحا ماشفت الا ثلاث حالات دقيقة (مو حالات دقيقة ولكن اعطوني دقيقة من وقتكم) ايها القراء النيرس دخلتني في مشكلة الدم… ايوه رجعت وانحلت مشكلة الدم. يارب يستمر الوضع بالهدوء هذا اذا لم يوجد اي كلام بعد النقطة التالية فالوضع استمر على وضع الهادئ.  يبدو انه لم يستمر دخلت مريضتين   ودقيت على الدكتور مرتين بيجر وعلى الغرفة وبالاخير رد وقالي الاولى صرفها ببنادول والثانية ارسلها لغرفة الولادة فوق وحاليا اكتب على سريري بنص عين. سلام.

يوم الاربعاء 17سيبتمبر

اليوم للاسف استيقظت في اسوأ وقت ممكن للعزابي انه يستيقظ فيه وهو بين العشاء والمغرب حيث ان كل المطاعم مقفلين ولاني توني جاي من الرياض الثلاجة جدا فاضية(يعنني دايم مليانه) بس حتى حليب مفيش فطلعت اهيم على وجهي بالسيارة ولسعادة حظي لقيت بيتزا ان فاتحة ومنها افطرت. اليوم شفتي في الاي ار كان اكثر من امس بس خلاص باعلنها المريضات الحوامل لاول مره (اول طفل) اسوأ مريضات ممكن الواحد يتعرض لهم في حياته يعني وقت الولادة خلاص بتموت وانواع الصراخ وتجي الطورائ ومعها امها واختها ويقولون لك  يادكتووووور حطها ع السرير بتموت ويالله يادكتور طلعها غرفة الولادة صراحة ما بقى الا اروح اكلم العميد حق الكلية عشان يسوي استثناء ويعطيهم شهادت طب عشان يبدأون يشتغلو معانا  ولما نفحصها نقولها عنق الرحم مقفل خلاص تسكت وكان ما كان فيها شي ابد ولا من زود السناعة بعد ترسل اختها تقول دكتور متى هي بتولد والله لو اعلم القدر يا اختي صدقيني ماكان دخلت كلية الطب لسبب واحد بس عشان مااقابلكم.

يوم الخميس 18 سيبتمبر

الام شديدة في بطني بعد وجبة السحور البارحة من البانوش فافطرت فطور خفيف وقررت اني ما اتسحر سحور جامد بعد فوقفت عند لوكروسان في طريقي الى الدوام الساعة 1 الليل باحثا عن مفن(كيكة صغيرة)لكن للاسف لما سالت البائع متى سويتوها قال من يومين ورحت لانوش اخذت حبتين كوكيز وحدة لي ووحدة للممرضة الي معاي ويالاخيبتي(من الخيبة) لما اكتشفت انها نفس النيرس الي قلت فوق انها اقل بروفشنال نيرس ممكن الواحد يشتغل معها واليوم بس تأكدت انو من جد عندها مشكلة عقلية الزبدة اليوم جتنا مريضة ودخل معها زوجها الى غرفة الطورئ حقت النساء والولادة حيث يوجد على الباب لوحتين كبار جدا مكتوب ممنوع دخول الرجال وكأن الاطباء مو رجال الزبدة لما دخل قامت النيرس الفاهية وقالت اطلع برا رفض استنجدت فيني وقلت له بكل برود لازم تطلع لانها منطقة نساء قال اذا جو(حضروا) مريضات اطلع. زلبت وبديت اخذ التاريخ المرضي من المريضة لانها مو شغلتي اطلع ازواج المريضات بس النيرس عصبت لان كلامها انكسر وما مشى دقت على الامن الي جو وقالو له اطلع رفض وقالهم انتو اطلعوا برا عيب عليكم زوجتي هنا وماادري كيف صار شد واخذ بالكلام الى فجأة قام زوج المريضة ودف رجل الامن وسكر باب الطورائ بظهره ورجل الامن الهزيل يحاول يدفع الباب بس مفيش فايدة  فاسمعه من برا يقول والله اني راح اكلم الشرطة وفعلا شوي الا اثنين عسكر من الشرطة وصلو ويقولون له اطلع برا وهو مو راضي سكروا الباب وانتظروه بالخارج جتني النيرس وقالت لاتسوي لها فحص اذا زوجها معها لانه ممنوع !! فقلت له (ممنوع وانا راح افحصها مع الممرضة) قال مفيش مشكلة وانا داخل بفصحها في غرفة الفحص الا هو يقولها بس بطنش يا مره يعني خليه بس يفحص بطنك. مشت هي وزوجها وجت الممرضة مبسوطة تقول سيارة الشرطة برا وبيركبونه معاهم بس اتوقع ان النيرس نصابة لاني بعد نص ساعة شفته عند الصيدلية.

ملاحظة:النيرس هاذي قد انضربت من قبل شاب جاي مع امه في احد شفتاتي معاها.

نهاية الأجازة

الليلة راح تكون اخر ليلة في اجازتي القصيرة الي استمتعت فيها الى حد ما في المدينة المزدحمة الرياض (من جد زحمة) والي صراحة استغليتها بقرائة عدد من الروايات ومشاهدة عدد من الافلام السيئة جدا (توبة اخذ منك افلام ياسعود).

نبدأ بالروايات

الرواية الاولى

قمت بتهريبها من البحرين واثار العنوان عامل الجمارك فقام يقلب بشكل سريع في الصفحات مش عارف ليش يمكن يدور عن صور. جبتها من البحرين لانها حسب ما قال لي العامل بمكتبة جرير انها ممنوعة وصراحة ما ادري ليش. الرواية هي عابر سرير للكاتبة احلام مستغانمي الي قريت عنها في اكثر من موقع وكمان ونصحني واحد من الشباب اني اقرأ لها وخصيصا عابر سرير صراحة استمعت بالرواية الكاتبة جدا جدا لامعة مش في احداث روايتها لكن في انتقالها من مشهد لمشهد وايضا في مناقشتها لكثير من المواضيع.

الرواية الثانية

Veronika Decides to Die

من بين كل مكتبة يوسف اخوي لسبب غير معروف سحبت الرواية هاذي للكاتب Paulo Coelho طبعا الرواية كانت مقبولة جدا وكنت جدا مستمتع في قرائتها الي خربها علي اني عرفت انها ماراح تموت من الحبوب المنومة الي بتاخذهم قبل قرائتي للقصة فكانت اول خمسين صفحة متوقع او عارف ايش راح يصير. وبسببها اعجبت في الكاتب وقررت اقرأ الرواية التالية.

الرواية الثالثة

Eleven Minutes

من بديت اقرأ الحروف في اول ابتدائي الى يومنا هذا مافي رواية قريتها بحياتي كرهت البطل . في هذه الرواية اناماكرهت Maria بطلة القصة لكن من جد ماكنت احبها مع استمتاعي الكامل بالرواية فما ادري هل فعلا الكاتب كان قاصد ذلك لانه اذا كانت مقصودة فهي حركة ذكية جدا وصعب القيام فيها لانو دائم تشعر اما بحزن او تعاطف او حب للبطل لكن كره اول مره بالنسبة لي.

الرواية الرابعة

Siddhartha by hermann hesse

الرواية هاذي ما استطعت اكمالها الى مابعد النصف لمللي وتفهيتي الشديدة اثناء قرائتي.

الرواية الخامسة

The Alchemist by Paulo Coelho

مع شهرة القصة وانتشارها الواسع صراحة ماكانت توقعاتي بالحجم الي انا اعتقدت انها راح تكون فيه لكن كانت جيدة وتقرأ. ممكن يكون السبب اني ما فهمت المغزى من القصة فمثلا تحوله لهواء ومحادثته للشمس وبشكل عام الرواية كانت جدا بسيطة واتوقع ان سبب انتشارها في امريكا تحدثها عن العالم القديم والتجار العرب وحروب القبائل. شخصيا اشوف ان امين معلوف في كتابته عن التاريخ افضل بمراحل من الرواية هاذي لكن يمكن Paulo Coelho كان ال personal legend حقة ان ينشر بالانقليزي لانه اول كتاب نشر بالانقليزي له فلذلك the universe has found its way to help him .

وفي الوقت الفاصل بين الروايات كانت الافلام تأتي وتراوحت جميعها بين السيئة جدا والمقبولة (لاترقى الى جيد) وفي عرض سريع شفت:

واخير المسلسل المحبوب والقريب الى قلبي والي تجمع عدد لابأس به من الحلقات بسبب الاختبارات والي مالقيت احد يحبة غيري

WEEDS

والسلام خير ختام

بحمدالله تمت

امس الاربعاء كان اخر يوم في حياتي كطالب حيث انهيت كورس النساء والولادة ونجحت فيه ولله الحمد والشكر.

وفي هذا الاربعاء الجميل ايضا تمت  الموافقة على تعديل اجزاء من جدول سنة الامتياز الي خربوا بيته الاسبوع الي راح بعد القيام بزيارة ودية لوكيلنا وشرح وضعي المحير وكالمعتاد طلب مني كتابة خطاب واحضارة.على كل حال جدولي الان افضل  بمراحل من اول واقول لنفسي لعلها خيرة.

وانشالله بعد اجازتنا الفقيرة الممتدة لاسبوعين راح ابدأ روتيشن نساء وولادة بس صراحة من الحين بديت اشتاق لحياة الطالب .

كسر الروتين

السلام

في محاولة لكسر الروتين العزابي الي اعيشة قبلت فكرة لعب التنس الارضي مع (حسن) الي ماقد لعب اللعبة بحياته لكنه كان يعتقد بشدة انه لاعب محترف فبها لكثرة متابعته لمباربات التنس على التلفزيون فكنت اقوله لو واحد يجلس من اليوم لبكرة يتابع الدوري الاوروبي مابيعلب ربع لعبهم فلا تصدق نفسك لكن استمر في اصراره.

بعد مماطلات لمدة اسبوعين بسبب الاختبارات وقع الاختيار على يوم الخميس (قبل امس) فحجزنا ملعب في فندق القصيبي وطلعنا اشترينا مضارب وكور وعلى القصيبي اتجهنا.

وفي القصيبي حضر ماجد كمشاركة روحية وتشجيع ودخلنا على المعلب الي غيروا محله فصار بعيد عن انظار المتطفلين وطبعا هذا الشي جيد جدا لاننا من جنبها فمالها داعي شايلين مضارب وحركتات واخرتها اذا جت الكورة الواحد منا يضرب الهواء جنبه والكورة تروح وراه.

دخلنا الملعب الي كان جدا نظيف(توهم مغسلينه) وشغلوا لنا الكشافات وبدأت التحمية وكمفاجأة لي كانت البداية ممتعة واستطعت سحق حسن في المبارة الاولى وقلت لماجد تعال جرب طبعا ماجد مو مستعد ابدا ولابس جينز(صحيح مو مستعد بس الظاهر لعب اكثر مني ومن حسن) وفاز حسن واستمر حسن بالفوز واستمر واستمر وكان مبسوط جدا كأنه فائز ببطولة العالم ولا هو ووجهه قام يعطينا نصائح بالاخير(من جد محترف).

في هذه الصورة حسن يحتفل بعد تسجيله هدف على ماجد

حسن جدا تنافسي اذا السالفة فيها فوز او هزيمة خاصة الرياضات فكرهت البلايستيشن بسببه وكرهت كورة القدم لانه ممكن يخلينا نعلب اكثر من ساعتين بس عشان يفوز فريقة فالتنس اشعلت فيه روح التنافس ذاك اليوم فلما مرت ساعة قلت له خلاص يالله نمشي خلص حجزنا فنظر الي نظرة ملئتني رعبا وخوف قال مالعبنا شي تونا اصبر لين مايجي عامل الفندق ويقول خلاص طبعا لو نسانا العامل وراح ينام ماعنده حسن أي مانع يلعب للصبح.

الهدف الجاي انشالله هو ال windsurfing الي قالي واحد من الشباب اني فيه ناس كل جمعة في الهاف مون فبروح اقط وجهي واشوف اذا فيه احد يدرب.

مجرد سواليف

الفترة هاذي مش من افضل ايام حياتي خصوصا مع القايني( مادة النساء والولادة) الا من جد مادة طويلة وفيها من التمغيط والتمطيط ووجع الراس يعني مش فاهم ليش ندرس شهرين ونص نساء وولادة واكثر من تسعين بالمية من الشباب ( يعنني مسوي دراسة) مابيدخلونها.

ندرس كل التفاصيل من تحمل لين تولد ومابعد الولادة وانواع السرطانات وانواع الامراض في الرحم والمبايض وووو ياخي عطونا مقدمة عنها وخلاص شي يمشيني لما اكون طبيب جراحة ولا باطنية بحيث اعرف الحالة واقدر احولها للمختص او ادخلها في الديفرنشيال. ولا بعد في سنة الامتياز ناخذ روتيشن شهرين

طبعا اليوم اخذ الاول في ترتيب السوء من دخلت الكورس. بعد ما صحيت امس بعد منتصف الليل قرأت بعض الاسئلة القديمة وراجعت شوي وبعدها على الاختبار الي ماكان سهل ولا صعب كان مدري وش يبي بس ادائي كان بشكل عام جيد.

بعد الاختبار قابلت واحد من الشباب الي بلغني ان جداول سنة الامتياز نزلت, رحت للسكرتيرة, الطالب الي قبلي جدولة عسل وكان مبسوط ولما جا دوري الا الترتيب رايح بعين امها لا من جد اعدام انا كنت مقدم جدولي(المقترح) على قولتهم للسبعة شهور الاولين كالتالي

مديسن تعليمي(مستشفانا) – سيرجيري الحرس بالرياض – طب طورائ حرس الرياض

حطوا لي الله يجزاهم بالجنة

مديسن تعليمي- نساء وولادة تعليمي-طب اسرة ومجتمع تعليمي

اكيد تقولون شو المشكلة, انا اقول لكم الاختبارات لاغلب التخصصات في الشهر السابع من سنة الامتياز يعني لو انا ابغى طورائ المقابلات والاختبارات راح تكون في شهر رقم سبعة (الي كنت انا مختار فيه طب الطورائ). ولازم اتأكد قبل لا اروح اقدم اني فعلا ابغى الشي هاذا بحيث اني اداوم في القسم واشوف الوضع وايضا تخلي الناس الي تبي تقدم عندهم يشوفونك ويعرفونك ويتعاملون معاك لكن الحين الوضع صار (بص حضرتك).

تجبرت بالله ورجعت الشقة مكسور الجناح (حلوة مكسور الجناح) دخلت الي فيه ريحة ابدا مش طيبة دخلت المطبخ قلت يمكن الزبالة بس لقيتها فاضية رشيت معطر جو ورحت احاول انام مفيش فايدة طلعت من الغرفة بشرب موية الا الصالة ريحتها جدا جدا جدا سيئة وكل ماقربت من المطبخ تزيد الرائحة(يعنني الشقة كبيرة) فتحت النافذة لقيت حمامتين وحدة توها مولودة والثانية ميته دفيت (قمت بدفع) الحمامة الميتة الي كانت جدا ملتصقة بالجدار وسكرت الدريشة بعدين رجعت فتحتها ثانية ودفيت الحمامة الحية مادري ليش سويت كذا المشكلة ان شكلها كان برئ مغمضة عيونها وبدون ريش بس هنيئا لقطاوة الحي.

طبعا الحين الساعة سبعة بعد المغرب ولي الف ساعة احاول انام لكن مش قادر الظاهر عشان الحمامة الي مغمضة عيونها (ايه صح).